उद्योग सचिव नेतृत्वको टोली पनि भारत प्रस्थान
Admin / 2014-05-27 02:35:54
नेपाल ब्युरो- जेठ १३ ,काठमाडौ । विषेश आर्थिक क्षेत्र (सेज) का बारेमा विकसित नया संरचनाको अध्ययन गर्न उद्योग मन्त्रालयका सचिव कृष्ण ज्ञावालीको नेतृत्वमा ६ सदस्यी टोली आज भारतको नयाँ दिल्ली प्रस्थान गरेको छ ।
भारतीय सरकारको प्राविधिक सहयोग र नेपाल सरकार उद्योग मन्त्रालयको सहयोगमा जेठ १३ देखि १५ गतेसम्म हुने भ्रमणमा टोलीले भारतमा सेजको स्थापना र त्यसले आर्थिक विकासमा खेलेको भूमिकाका विषयमा जानकारी लिने बताइएको छ ।
भ्रमणका क्रममा टोलीले भारत सरकारका वाणिज्य सचिव राजबीर खैर, औद्योगिक नीति तथा प्रवद्र्धन विभाग सचिव अभिताभ कान्तसँग नेपालमा वैदेशिक लगानी तथा
औद्योगिक विकासका बारेमा छलफल गर्नेछ ।
त्यसैगरी टोलीले दिल्लीस्थित नेयडा सेजको भ्रमण गरी त्यहाँको वस्तुस्थितिबारे बुझ्ने छ । सेजको सञ्चालन तथा व्यवस्थापनमा भारतको अनुभव, ज्ञान र सीपको बारेमा नेपाली टोलीले जानकारी लिनेछ ।
भ्रमण पश्चात नेपालमा सेज सञ्चालनका लागि उपयुक्त नीति अवलम्बन गर्न सहयोग पुग्ने बताइएको छ ।
प्रकाशित मिति: 2014-05-27 02:35:54
प्रतिक्रिया: