आत्मबिश्वास बलियो बनाएर फर्कियो युवा टोली
Admin / 2014-07-22 00:47:51
श्रावण ६ - नेपालले कुनै पनि तहको कोरियाली टिमविरुद्ध बराबरी नतिजा निकाल्नु चानचुने कुरा होइन । दुई साताको प्रशिक्षण र मैत्रीपूर्ण खेलमा यस्तै अनुभव बटुल्दै आत्मविश्वासी बनेर नेपाली यू-१६ टिम सोमबार स्वदेश फर्किएको छ ।
नेपाली किशोर टिमले कोरियाली टिमको प्रशिक्षण गर्ने पाजु नेसनल ट्रेनिङ सेन्टरमा दुई साता प्रशिक्षण गरेको थियो । दुई महिनापछि थाइल्यान्डमा हुने एएफसी यू-१६ च्याम्पियनसिपको तयारीमा रहेको नेपालले मैत्रीपूर्ण खेलमा कोरियाको यू-१६ टिमसँग शनिबार गोलरहित बराबरी नतिजा निकालेको थियो । पहिलो रोजाइका डिफेन्डरद्वय सुदन थापा र गौरव मगर, मिडफिल्डर हेमन्त थापामगर र फरवार्ड अञ्जन विष्ट घाइते भएकाले कोरियाविरुद्ध मैदानबाहिरै थिए ।
'युरोपियन क्लबको एकेडेमीमा आबद्ध खेलाडी पनि कोरियाको यू-१६ राष्ट्रिय टिममा थिए,' नेपाल यू-१६ का प्रशिक्षक बालगोपाल महर्जनले भने, 'उनीहरू स्किलफुल भएकाले हामीले रक्षापंक्तिमा जोड दिएर अगाडि बढ्ने रणनीति अँगालेका थियौं, जुन सफल भयो ।' त्यसअघि नेपालले दुई स्थानीय स्कुलका युवा टिमविरुद्ध पनि मैत्री खेल खेलेको थियो ।
अनन्त तामाङ र संजोग राईको गोल सहयोगमा नेपालले बोइन हाईस्कुलविरुद्ध २-२ को बराबरी खेल्यो । त्यसपछि नेउङगोक हाईस्कुलविरुद्ध दिनेश राजवंशीले गोल गरेपछि नेपाल यू-१६ ले १-० को जित निकालेको थियो । '१७/१८ वर्षका खेलाडी रहेका दुवै प्रतिद्वन्द्वी राम्रा थिए,' प्रशिक्षक महर्जनले भने, 'तर, हामीले राम्रो खेल्यौं । खेल हाम्रै नियन्त्रणमा थियो । सबैले मिहिनेत गरेर
खेले । त्यसैले नतिजा सोचेजस्तै भयो । यसले हाम्रो आत्मविश्वास र स्तरवृद्धि गरेको छ ।'
राम्रो सुविधामा निरन्तर प्रशिक्षण गर्ने र प्रतिस्पर्धा गर्ने अवसरले टिमको स्तर वृद्धि भइरहेको उल्लेख गर्दै महर्जनले भने, 'यस्तो तयारी निरन्तर गरेमा जुनसुकै बलिया टिमलाई पनि चुनौती दिन सक्छौं ।' टिममा अझै सुधार गर्ने ठाउँ भएको पनि उनले बताए । एएफसी यू-१६ तयारीको सिलसिलामै नेपाली टिम अब १० दिनका लागि कतार र त्यसपछि बेल्जियम जाने बताइएको छ ।
सेप्टेम्बर ६ देखि थाइल्यान्डमा हुने एएफसी यू-१६ च्याम्पियनसिपमा नेपालले समूह 'सी' मा उज्वेकिस्तान, कुवेत र उत्तर कोरियाविरुद्ध खेल्नेछ । नेपालले छनोट चरणमा इराक, बहराइन र तुर्कमेनिस्तानलाई पन्छाउँदै एएफसी यू-१६ मा दोस्रोपल्ट फाइनल चरणको यात्रा तय गरेको हो ।
प्रकाशित मिति: 2014-07-22 00:47:51
प्रतिक्रिया: