एमालेको नयाँ नेतृत्व चयनका लागि मतदान सुरु
Admin / 2014-07-11 08:22:45
नेपाल ब्युरो–असार २७, काठमाडौँ ।
नेकपा एमालेको नवौं महाधिवेशनमा नयाँ नेतृत्व चयनका लागि मतदान सुरु भएको छ ।
विहान ८ बजेबाट सुरु हुने भनिएको मतदान मतपत्र चाडो नआईपुग्दा साढे ८ घन्टा ढिलो गरी सुरु भएको हो । मतदानका लागि पदाधिकारी र अन्य गरी दुई बटा मत पेटिका राखिएको छ । पदाधिकारी, खुला, समावेशी र बैकल्पिक केन्द्रीय सदस्य, अनुशासन अयोग र लेखा गरी ६ बटा मत पत्रमा मतदान गर्नु पर्नेछ । २ हजार १ सय ७६ प्रतिनिधिले मतदान गर्नेछन ।
माधवकुमार नेपाल र केपी शर्मा ओली दुबै पक्षले प्यानल नै बनाएर चुनावी मैदानमा हुनुहुन्छ ।
एमालेको यो महाधिवेशनबाट एक अध्यक्ष, पाँच उपाध्यक्ष, एक महासचिव, दुई उपमहासचिव र पाँच सचिव चयन हुनेछन् । ती पदहरुमा दुई प्यानलबाट २८ जनाको उमेदवारी परेको छ । त्यस्तै एकसय १५ पूर्णसहित एकसय ५९ सदस्यीय केन्द्रीय कमिटीका लागि झण्डै साढे चारसय जनाको उमेदवारी परेको छ ।
नयाँ नेतृत्वका लागि अध्यक्षका प्रत्यासी माधवकुमार नेपाल र केपी शर्मा ओलीले हिजो औपचारिकरुपमै आ आफ्नो प्यानल घोषणा गरिसक्नु भएको छ ।
जसअनुसार नेपाल समूहले उपाध्यक्षमा युवराज ज्ञवाली, अष्टलक्ष्मी शाक्य, भीम रावल, लालबाबु पण्डित र राजेन्द्र पाण्डे उम्मेदवार बनाएको छ । यस्तै महासचिवमा सुरेन्द्र पाण्डे, उपमहासचिवमा रघुजी पन्त र घनश्याम भुसाल तथा सचिवमा गोकर्ण विष्ट, योगेश भट्टराई, भीम आचार्य, परशुराम मेघी गुरुङ र वेदुराम भूषाललाई अघि सारिएको छ ।
यसैगरी ओली समुहले उपाध्यक्षमा वामदेव गौतम, विद्यादेवी भण्डारी, प्रदीप नेपाल, किरण गुरुङ र धर्मनाथ शाहलाई उठाएको छ । महासचिवमा ईश्वर पोखरेलको उम्मेदवारी दर्ता गरिएको छ । उपमहासचिवमा विष्णु पौडेल र शङ्कर पोखरेल तथा सचिवमा प्रदिप ज्ञवाली, विष्णु रिमाल, केशवलाल श्रेष्ठ, पृथ्वीसुब्बा गुरुङ र रघुवीर महासेठको उम्मेदवारी दर्ता भएको छ ।
प्रकाशित मिति: 2014-07-11 08:22:45
प्रतिक्रिया: