नेपाल ब्युरो–जेठ ३०,काठमाडौ ।
उपराष्ट्रपति परमानन्द झाले खाद्य पदार्थको उत्पादन र वितरण मानवको जीवनसँग जोडिएकाले यसमा सरकारले विशेष ध्यान दिनुपर्नेमा जोड दिनुभएको छ ।
सातौं खाद्य विज्ञान तथा प्रविधि सम्मेलनको आज राजधानीमा उद्घाटन गर्दे उहाँले खाद्य प्रविधि, गुणस्तर र सुरक्षाको क्षेत्रमा सरकार र उपभोक्ता दुबै चनाखो हुनुपर्नेमा जोड दिनुभएको हो ।
खुल्ला बजारीकरणका कारण बिग्रंदै गएको असन्तुलित बजारलाई सुरक्षित गर्नु अहिलेको चुनौती रहेको उहाँको भनाई छ ।
कार्यक्रममा बोल्नुहुँदै कृषिमन्त्री हरि पराजुलीले कृषि क्षेत्रको वैज्ञानिकीकरण बिना मुलुकको आर्थिक विकास सम्भव नहुने भएकाले कृषिलाई आधुनिकीकरण गर्न सरकारले विशेष तयारी गरेको बताउनुभयो ।
दैनिक रुपमा युवा पलायन हुँदा कृषि क्षेत्र प्रभावित भएको भन्दै उहाँले युवालाई कृषि क्षेत्रमा आकर्षित गर्नको लागि सरकारले सम्बन्धि पक्षसँग छलफल अगाडि बढाइरहेको जानकारी दिनुभयो ।