सन् १९३० मा उरुग्वेबाट फुटबलको महासंग्राम सुरु भएको ठीक ८४
वर्षपछि ब्राजिलमा फुटबलको महासंग्राम चल्दै छ। आज बिहीबारको मध्यरातदेखि
महासंग्रामले विश्वको ध्यान खिच्ने छ। त्यसमा पनि विशेष गरेर फुटबलप्रेमीहरुको
लागि यो महासंग्राम चुनौति र रोमान्चक बन्नेछ।
दक्षिण अमेरिकी देश अर्थात् राष्ट्रिय खेल फुटबल भएको देश ब्राजिलको १२ वटा रंगशालामा एक महिना महासंग्राम चल्ने छ। अहिले विश्वका फुटबल पण्डितहरुसँगै प्रेमीहरुको पनि ध्यान ब्राजिलले खिचिरहेको छ। ब्राजिललाई विश्वकप भइरहेको मानेमा मात्रै ध्यान खिचेको छैन, उसले उद्घाटन खेलको परिणामसँगै ८४ वर्ष अघिको आयोजक राष्ट्र उरुग्वे झै इतिहास बनाउन कि सक्ला भन्दै फुटबल पण्डितहरु अड्कल काटिरहेका छन्।
फुटबलको आँखा हुदैन भनिन्छ र, हुन्छ पनि त्यस्तै। २० औं संस्करणसम्म आइपुग्दा पाँचपल्टको विजेता बनिसकेको ब्राजिल तिर सबैको ध्यान हुनु स्वाभाविक मानिन्छ। संस्करण थप्नेमा अहिले ब्राजिलका खेलाडीलाई ठूलो चुनौति थपिएको छ। त्यतिमात्रै हैन, त्यहाका विकास निर्माण, सामाजिकमा खर्चिने सम्पूर्ण रकम रंगशाला अर्थात् फुटबलमा लगानी गर्यो भनेर ठूलो आरोप पनि खेपेको वर्ष भएकाले पनि ब्राजिलको लागि यो महासंग्रामले ठूलो अर्थ राख्नेछ।
अझ २२ वर्षे ब्राजेलियन खेलाडी नेइमार तर्फ सवैको ध्यान आकृष्ट छ यतिखेर। जब ब्राजिलकै क्लब सान्तोषमा खेलिरहेका नेइमार एकाएक युरोपको राम्रो क्लबमा खेल्न आमन्त्रित भएपछि थप अरुको पनि ध्यान खिच्न सफल भए।
त्यसपछिका दिनमा सन्तोषजनक प्रदर्शन गर्न नसके पनि चर्चा भने चुलिरहेको खेलाडीले बिश्वकपमा के गर्ला भन्ने उत्सुकता सबैलाई छ। ब्राजिलियन मात्र नभएर विश्वभरमा उनका फ्यानहरुको उनीप्रति अहिले अपेक्षा र चिन्ता दुबै छ।
उद्घाटन खेल बिहीबारको मध्य राति अर्थात् नेपाली समयअनुसार राती १ बजेर ४५ मिनेटमा सुरु हुदैछ। महासंग्रामको पहिलो लिग खेल आयोजक राष्ट्र ब्राजिलले क्रोएसियासँग खेल्दैछ। क्रोएसिया आफैंमा पनि राम्रो क्षमता भएको देशमा गनिन्छ। सन् १९९८ को संस्करणमा तेस्रो हुनु नै उसको अहिलेसम्मको सबैभन्दा ठूलो सफलता हो। त्यसपछि क्रोएसियातर पनि विश्वभरका समर्थकको ध्यान खिचेको थियो।
कोएसियाका डेभोर सुकरले तत्कालिन समयका सर्वाधिक गोलकर्ताको उपाधि जितेका उनले ६ गोल गरेका थिए । तत्कालिन समयमा ब्राजिलसँगै क्रोएसियाले सेमिफाइलन हारेको थियो। अहिलेको क्रोएसिया केही कमजोर भएपनि ब्राजिलले उसलाई सजिलो प्रतिद्धन्दीको रुपमा लिएको छैन।
गृह मैदानमा घरेलु समर्थकमाझ हुने विश्वकपको पहिलो खेल जित्नु ब्राजिलका लागि मनोवैज्ञानिक हिसाबले महत्वपूर्ण हुन्छ।
एक महिने फुटबल महासंग्रामलाई ब्राजिलका रंगशाला मै पुगेर ३३ लाख ३४ हजार दर्शकले प्रत्यक्ष हेर्ने छन् भने टेलिभिजनमार्फत विश्वभरिका करिब ४ अर्ब दर्शकले अवलोकन गर्ने अनुमान गरिएको छ। जसका कारण संसारका फुटबलप्रेमीलाई मात्रै हैन, विश्वलाई नै महासंग्रामले एक बनाउने अनुमान सबैको छ।
२०१४को विश्वकप सम्भवतः संसारकै सबैभन्दा धेरै दर्शकले हेरेको सबैभन्दा ठूलो खेल प्रतियोगिता हुनेछ।
यस संस्करणका लागि सन् २०११ देखि सुरु भएको विश्वकप फुटबलको छनोट खेलमा ६ वटै महादेशका २ सय ७ राष्ट्र सहभागी थिए। जसबाट ३१ राष्ट्रले फाइनल चरणको टिकट काट्दै महासंग्राममा भिडन्त गर्ने मौका पाएका हुन्। आयोजक राष्ट्र भएको नाताले ब्राजिल सोझै फाइनल चरणमा छनोट भएको थियो।
संसारभर छरिएर रहेका ब्राजिलका फ्यानहरु आफ्नै भूमीमा भएको प्रतियोगिता उसैले जितोस् भन्ने चाहन्छन्। विश्वभर र नेपालमा पनि ब्राजिलकै छिमेकी देश अर्जेन्टिनाका फ्यानहरु पनि कम छैनन्।
आफ्नै देशको पक्षमा ढुकढुकी थामेर बस्ने ३२ देशका नागरिकहरु र आफ्नो टिमका पक्षमा लाग्ने विश्वभरमा मानिसहरुले आजदेखि सुरुहुने फुटबलको महाकुम्भलाई एक महिनासम्म रोमाञ्चक बनाइरहने छ।