नेपाल ब्युरो –जेठ १०, काठमाडौँ ।
प्रधानमन्त्री सुशील कोइरालाले सोमबार गर्न लागेको भारत भ्रमणबारे कुटनीतिक क्षेत्रमा लामो अनुभव संगालेकाहरुसँग आज छलफल गर्नुभएको छ ।
कोइराला भारतमा नवनिर्वाचित प्रधानमन्त्री नरेन्द्र मोदीको सपथ ग्रहण समारोहमा भाग लिन नयाँ दिल्ली जाँदै हुनुहुन्छ । मोदीको सपथ समारोहमा भारतले सार्क राष्ट्रका सबै सरकार प्रमुखलाई निम्ता गरेको छ ।
भारत भ्रमणलाई कसरी सदुपयोग गर्न सकिन्छ भन्ने बारे विज्ञहरुसँग कोइरालाले सुझाव लिएको उहाका प्रेस सहयोगी प्रकाश अधिकारीले बताउनुभयो । सदभावना र शिष्टाचार भ्रमण मात्रै भएकाले एजेन्डामा छलफल भन्दा पनि दुई देशबीचको सम्बन्ध बढाउने दिशामा उपयोग गर्न सकिने विज्ञहरुको सुझाव थियो ।
छलफलमा परराष्ट्र मामिलासम्बन्धी विज्ञ र कुटनीतिक क्षेत्रमा लामो अनुभव संगालेका भारतका लागि पूर्व नेपाली राजदूत प्रा लोकराज बराल, पूर्व राजदूत डा भेषबहादुर थापा, दुर्गेशमान सिंह, शम्भुराम सिम्खडा, पोषराज पाण्डे , डा केदारभक्त माथेमा, गेजा शर्मालगायतको सहभागिता थियो ।
छलफलपछि सञ्चारकर्मीसँग कुरा गर्दै पूर्व राजदूत बरालले प्रधानमन्त्रीको सदभावना भ्रमण भएकाले दुई देशबीचको पारस्परिक हित र नेपालको विकासमा केन्द्रित रहेर कुरा गर्न सुझाव दिइएको बताउनुभयो ।