नेपाल ब्युरो–जेठ ८, काठमाडौ ।
लमजुङको पर्यटकीय गाउँ तार्कु गहतेमा निर्माण गर्न लागिएको फुटवल मैदानका लागि बेलायतमा बसोवास गर्नेहरुले ८ लाख रुपैयाँभन्दा बढी सहयोग गरेका छन् ।तार्कु गहते साथै त्यस वरपर घर भई हाल बेलायतमा रहेकाहरुले ८ लाख ११ हजार २ रुपैयाँ चन्दा सहयोग गरेका हुन् ।
तार्कू गाउँ विकास समिति वडा नम्बर १, मौलाडाँडामा निर्माण गरिने फुटवल खेल मैदानका लागि बेलायतमा संकलन गरिएको रकमलाई एक कार्यक्रमको आयोजना गरि हस्तान्तरण गरिएको छ ।
तार्कू गाविस वडा नम्बर १, गहते घर भई हाल बेलायती सेनाका पेन्सन निबृत्त ईन्द्रजीत गुरुङले बेलायतमा संकलन भएको ८ लाख ११ हजार २ रुपैयाँलाई खेलकुद मैदान निर्माण समितिका उपाध्यक्ष कृष्णबहादुर गुरुङलाई हस्तान्तरण गर्नुभयो ।
खेलकुद मैदान निर्माणका लागि बेलायतमा २ चरणमा चन्दा संकलन गरिएको थियो । पहिलो चरणमा संकलन गरिएको ४ लाख ५० जहार ४ सय २२ रुपैयाँ ४३ पैसा र दोश्रो चरणमा संकलन गरिएको ३ लाख ६० हजार ५ सय ६० रुपैयाँ संकलन गरिएको थियो ।
खेलकुद मैदान निर्माणका लागि पहिलो चरणमा तार्कू गहते घर भई हाल बेलायतमा रहनुभएका गणेश गुरुङले १ लाख ६ हजार २ सय ७५ रुपैयाँ, विष्णु गुरुङले १ लाख ५ हजार ४ सय ५७ रुपैयाँ, उदयी गुरुङले १ लाख २ हजार १ सय ८७ रुपैयाँ, ईन्द्रजीत गुरुङले १ लाख रुपैयाँ, अम्बर बहादुर गुरुङले १ लाख रुपैयाँ, प्रेमबहादुर गुरुङले ५० हजार १ रुपैयाँ सहयोग गरेका छन् । यस्तै, तार्कू गहते बाहिराका शुभचिन्तकहरुले समेत रकम प्रदान गरेका छन् । खरी भञ्ज्याङका कुमार गुरुङले ३२ हजार ७ सय, खरीभञ्ज्याङकै नवीन गुरङले २५ हजार २ सय ८, तौलीहवा लुम्बिनीका काशीराज बोहराले ३२ हजार ६ सय, रुपैयाँ सहयोग गरेकाछन् । यस्तै, रकम हस्तान्तरण कार्यक्रममा तार्कू गहते घर भई हाल माल्दिभ्समा कार्यरत तुलाराम गुरुङले २० हजार १ सय ५ रुपैयाँ हस्तान्तरण गरेका छन् ।
कालिका युवा क्लव तार्कु गहतेले निर्माण गर्न लागेको खेलकुद मैदानको सहयोगका लागि बेलायतमा उदयी गुरुङको संयोजकत्वमा रकम संकलन गरिएको हो । संकलित रकमलाई तार्कू गहतेको चण्डीडाँडामा एक कार्यक्रमको आयोजना गरि हस्तान्तरण गरिएको थियो । त्यस अवसरमा कार्यक्रमका प्रमुख अतिथि बेलायती सेनाका पेन्सन निबृत्त ईन्द्रजीत गुरुङ, उनका परिवार लगायतका चन्दादातालाई सम्मान गरिएको थियो ।
खेलको विकास गाउँगाउँबाट गर्ने उद्देश्यले ११ साईजको खेलकुद मैदानको निर्माणकार्य तत्काल थालिने भएको छ । खेलकुद मैदान कूल १५ लाख रुपैयाँको लगानीमा निर्माण गरिने कालिका युवा क्लब तार्कू गहतेका अध्यक्ष एवं तार्कु गाविस खेलकुद समितिका अध्यक्ष गमबहादुर गुरुङले जानकारी दिनुभयो ।