इन्द्र जात्रा आज मनाइँदै
Admin / 2014-09-08 02:56:07
नेपाल ब्युरो– भदौ २३, काठमाडौ ।
इन्द्रको देवता पूजा–आराधना गरी आज इन्द्रजात्रा पर्व मनाइँदैछ ।
हरेक वर्ष भाद्र शुक्ल चतुर्दशीका दिन पर्ने यो पर्व काठमाडौं उपत्यकाका नेवार समुदायले वर्षा र सहकालका देवता इन्द्रको पूजा–आराधना गरी परम्परागत रुपमा इन्द्रजात्रा पर्व मनाउँदै छन् ।
काठमाडौं, ललितपुर, भक्तपुर, धुलिखेल र दोलखा लगायतका स्थानमा सो पर्व मनाउने गरिन्छ । यो पर्व लिच्छवीकालदेखि मनाउन थालिएको बताइन्छ ।
भाद्र शुक्ल द्धादशीका दिन हनुमानढोका अगाडि धार्मिक विधिपूर्वक इन्द्रध्वजासहितको लिंगो ठड्याइएपछि प्रारम्भ हुने यो जात्रा विभिन्न प्रकारका नाचगान, रथयात्रा र देवीदेवताको पूजाआजा गरी आठ दिनसम्म मनाइन्छ । इन्द्रजात्राको अवसरमा सरकारले उपत्यकामा आज सार्वजनिक बिदासमेत दिएको छ ।
यसअघि, तान्त्रिक विधिद्वारा पूजा गरी काभ्रेको नालास्थित जंगलमा पर्साएर छोडिएको बोकाले छोएको रुख काटी एकादशीका दिन विधिपूर्वक इन्द्रध्वजाको लिगो ठड्याइएको थियो ।
इन्द्रजात्राका अवसरमा आज अपराह्न कुमारी, गणेश र भैरवको रथयात्रा गरिँदै छ । रथयात्राको राष्ट्रपति डा रामवरण यादवले अवलोकन गर्नुहुनेछ ।
प्रकाशित मिति: 2014-09-08 02:56:07
प्रतिक्रिया: